[Ku është lajmi] Wait, oh donkey for the grass to grow

Episodi I

Në fillim po përcaktoj se si do ta përdor fjalën “lajm” në këtë post. Lajmi është një ngjarje që në vetvete përcjell diçka të re, për të cilën nuk ishe i sigurt se do të ndodhte deri në momentin që e dëgjove. Për shembull, të thuash në vitin 2013 se toka rrotullohet rreth diellit, nuk përbën lajm pasi është diçka e ditur. Lajmi është më i madh dhe më i fuqishëm atëherë kur ngjarja është e jashtëzakonshme dhe e papritur.

"Para pak ditësh Shqipërisë iu refuzua statusi i vendit kandidat të Bashkimit Europian".
"Shqipëria festoi ndërrimin e viteve".

Këto dy lajme kanë të përbashkët më shumë nga sa duket. Në radhë të parë asnjëri prej tyre nuk përbën lajm, por janë thjesht ngjarje. Kishte ndonjëri shpresa se do na e jepnin këtë vit? Po vitin e ardhshëm? Kush pretendonte me të vërtetë statusin këtë vit ose nuk jeton në Shqipëri ose nuk ka parë "jashtét" me sy. Ka dhe disa që kanë mbetur pa fjalë sepse Shqipëria ndodhet në kontinentin europian, atëherë pse nuk pranohet në BE? Por Skifteri nuk ka pasur asnjëherë konsideratë për këta dhe u është drejtuar gjithmonë në mënyrën e vetë.

BE shpjegon qartë ku kemi gabuar...

Ta sqarojmë menjëherë arsyen pse s'na e dhanë statusin sepse as shkaku nuk përbën lajm. Nuk na e dhanë sepse nuk jemi gati dhe as nuk u përgatitëm që t'i plotësonim detyrat elementare që na caktuan. Ne u paraqitëm në ekzaminim si studenti që shkon në provim pa mësuar, aq sa vlerësuesit e BE-së as që e kishin të vështirë të shkruanin raportin, modifikuan pak atë të herës së kaluar.

Arsyeja e vërtetë pse nuk mësuam për provim do përbënte një lajm vetëm për faktin se do pranohej publikisht por jo se nuk dihet. Ateherë le të zgjedhim një arsye tjetër më të butë: "kishim mamin sëmurë, s'na ranë pyetjet që kishim mësuar, s'na lanë të kopjonim".

Fjala kyçe që bashkon këto dy ngjarje është pra periodiciteti. Nëse Shqipëria çdo 365/366 ditë feston Vitin e Ri, me një frekuencë të përafërt pret dhe refuzimin e vendit kandidat.

Atëherë kush do përbënte një lajm të vërtetë dhe të fuqishëm? Lajm do të përbënte një parashikim real i vitit në të cilit Shqipëria do hyjë në BE. Për këtë le të reflektojmë mbi pyetjen: a duan shqiptarët të hyjnë në BE (u intereson)? Sigurisht, nuk bëhet fjalë për popullin shqiptar për të cilin fjala europian tingëllon trendy. Bëhet fjalë për të urtët e vendit. Do të ishte tragjike sikur për dikë të dyja ngjarjet e mësipërme të ishin festa.

Skifteri që është gjithmonë i ndjeshëm ndaj çështjeve të rëndësishme, përpiqet që të tërheqë vëmendjen e shqiptarëve drejt integrimit europian. Këtë ai e realizon duke iu drejtuar pjesës më të madhe që janë bastexhinjtë. Edhe sa festa ndërrim viti do festojë Shqipëria para se të hyjë në BE? Koefiçientët janë si më poshtë:

1-5 ---> 20
6-10 ---> 3.4
11-15 ---> 1.7
më shumë se 15 ---> 6.7

Gjeniu i vogël: Flamuri evropian ka 12 yje sepse kur është caktuar BE ka pasur 12 shtete.