[Survivor] Rëndësi ka mendimi

- Zemër, sa të bukura këto çorapet!
- Po... Në fakt doja të të blija... po ti e di që kohët e fundit...
- E di shpirt, rëndësi ka mendimi.

Është periudhë festash, ku dhurata bëhet një nga personazhet kryesorë. Personazhet e tjerë janë ushqimi, zgjedhja e pub-it dhe ata që na duan dhe i duam. Ka njerëz që kanë shumë qejf të bëjnë dhurata, duke filluar që nga zgjedhja e tyre e deri te paketimi. Në ekstremin tjetër ka njerëz që urrejnë të bëjnë dhurata.

Arsyet janë nga më të ndryshmet: përtesa, kopracia, vështirësia e zgjedhjes, ose thjesht destinacioni nuk e meriton dhuratën por "duhet". Dikush prej jush do pyesë veten me të drejtë: pse të bësh dhuratë kur nuk e ndjen? Eh, pse nuk e kanë provuar kujtoni ju të mos bëjnë dhuratë? Kanë marrë qortime, sharje dhe ja ku janë sot të "detyruar" të bëjnë dhurata. Do ndalemi te kjo kategori e cila ka përdorur (shpikur?) fjalë të urta e shprehje popullore duke i shndërruar në parime që respektohen ad litteram. Ja disa grimca të zgjedhura rëndom por jo të rëndomta, të shkëputura nga Skifteri Progress Report (SPR).

Shumë e për lumë, pak e saktë. Sokrati nga Tepelena i dha 200 lekë të reja djalit që t'u jepte shokëve një drekë.

Trimi i mirë me shokë shumë. Indriti nga Kombinati (Tr) mblodhi lacat e lagjes që t'i gjenin dhuratë të dashurës dhe vajtën nga TEG-u. Lacat u treguan shumë proaktivë dhe sugjeruan goxha variante: varëse me gur Swarovski, shall nga Zara, paketë masazhesh, një orë Swatch. Indritit i kishte thënë e ëma "pyet shtatë vetë e bëj si di vetë". Kështu që ai i bleu një çadër te çamët dhe një kartolinë të lezetshme.

Hermiola nga Tirana: "Gjithkush që leu mendjen e tij pëlqeu. Më mirë jepu lekë dhe e dinë vetë ç'të blejnë".

Një i ri nga Fieri, nuk i bleu dhuratë së dashurës për Shën Valentin sepse "më mirë një mik se sa një thesar dhe dhurata më e shtrenjtë për ty jam unë". Mirëpo e dashura paskësh dëshiruar më mirë thesarin, kështu që për pak kohë e la djaloshin fierak për një lac nga Tirana.

Bashkimi, një polic, tip familjar nga Shkodra e ka si parim që në familje s'duhet të bësh dallime, prandaj djalit të vogël i bleu një pistoletë lodër, vajzës një pistoletë lodër, kurse gruas një pistoletë lodër. Pistoleta e gruas qëlloi skarco, po ç'rëndësi ka? "Nuk do rrojë më shumë se ne". Që të kursente për vete mbajti pistoletën e punës dhe filluan të luajnë së bashku.

Muharremi nga Tirana edhe natën e Vitit të Ri punoi si roje te firma X sh.p.k. I ati, pak pijanec nga natyra, i thoshte gjithnjë se ai që të rreh të do. Në mëngjesin e 1 janarit, kur u kthye në shtëpi Muharremi i bëri dhuratë një dru gruas që ta mbante mend për gjithë jetën.

Skifteri i kupton të gjitha, po ato statujat prej porcelani s'i ka kuptuar ndonjëherë si dhurata. Sa pa fantazi duhet të jesh? Janë lirë? Apo ta kanë bërë dhuratë dhe s'di ta heqësh qafe?

Gjeniu i vogël: I ka shumë qejf surprizat. Kështu që s'i bëra asnjë dhuratë.