[Survivor] Të përdorësh flamurin

Kemi thënë shumë herë që do rikthehemi te temat që kemi trajtuar, por gjithmonë ka dalë diçka e re.

Sot është rikthimi i parë. Ky është Patriotizmi Reloaded.

Tani, është kjo Aleanca Kuq e Zi…Skifteri ka një pyetje shumë të thjeshtë:

Për çfarë na shërben kjo?

Për të ndalur politikat denigruese të fqinjëve tanë, për të ruajtur identitetin kombëtar dhe për të luftuar për kauza nacionaliste siç është ajo e Çamërisë.

Le t`i njohim disa merita; Duhet një zë që të alarmojë opinionin publik për çështje si censusi, ose marrëveshja detare me Greqinë, ose varret skandaloze të ushtarëve grekë në jug dhe çështje të ngjashme.

Për Skifterin në këto raste mjafton edhe të mos bësh gjë konkrete, por të bërtasësh që populli të dëgjojë çfarë po ndodh dhe në këtë mënyrë të vësh nën presion pushtetarët, në mënyrë që të kenë kujdes kur është në lojë dinjiteti i popullit që e ka votuar.

Pastaj flasin për bashkimin Shqipëri-Kosovë.

Shqipëria me Kosovën do bashkohen, në qoftë se po, kur të vendosin forca të tjera të jashtme, jo kur vendos Kreshnik Spahiu. Me shumë gjasa do jenë të njëjtat forca  që vendosën pavarësinë e saj. Nuk kemi dëgjuar për kontributin e Kreshnikut në pavarësinë e Kosovës.

Megjithatë, e vlerësojmë faktin se ka një zë që përfaqëson aspiratat e dy popujve dhe mund të shërbejë si lobbying, çka është gjithmonë i domosdoshëm. Po s`kërkove duke qarë derisa t`i lodhësh s`të jep gjë njeri (shih formimin dhe vazhdimësinë e Izraelit për të kuptuar efektet e lobbying). Ky mund të quhet detyrim ndaj qytetarëve të të dyja vendeve.

Por pastaj vjen Çamëria dhe këtu Skifteri distancohet. Slogane, tone të ashpra, kërcënime Greqisë, premtime që do vijë dita…

Dita për çfarë? Kush na e shpjegon çfarë?

Do merren tokat? Do ndryshojnë kufijtë? Apo dëmshpërblime të gjithë çamëve?

Që i bie që Greqia të pranojë, në mos genocidin, spastrimin etnik?

E ka idenë Kreshniku i dashur sa mundësi ka të ndodhë kjo? Ka dëgjuar Kreshniku për genocidin armen nga turqit? E di që ka ndodhur që në 1915-ën dhe turqit jo vetëm që mohojnë që ka ndodhur, por janë të gatshëm të prishin marrëdhëniet me çdo shtet që thjesht e përmend dhe vendos ta diskutojë?

Pastaj Kreshniku po na thotë që Greqia, një nga vendet me shoviniste, ksenofobe në përgjithësi dhe antishqiptare në veçanti, do përkulet ndaj presionit të Aleancës Kuq e Zi dhe do thotë “Po, kam gabuar” me kokën poshtë? Po flasim për të njëjtën Greqi?

Apo do sensibilizohet komuniteti ndërkombëtar? Për Çamërinë? E keni idenë sa masakra ka vërdallë për të cilat s`kujtohet njeri?

Deri tani u treguam qëllimisht naivë. Sepse Kreshniku e di shumë mirë që bashkimi me Kosovën dhe çështja çame janë fjalë dhe kaq, tani herët vështirë të ndryshojë ndonjë gjë. Por ai di edhe që këto fjalimet patriotike-nacionaliste kanë shumë efekt në turmë, njerëzit gjejnë komfort te këto gjëra, ndihen mirë, të krijosh armiq gjithmonë ka ndihmuar në politikë. Nuk të pyet më njeri as për platformë dhe vizion kur ti me ton triumfator shpall të hapur luftën për Shqipërinë e Madhe, Shqipërinë Etnike.

Sukseset e demagogjisë njihen prej kohësh

Që është njëlloj me ëndrrën për Bullgarinë e Madhe, ose Serbinë e Madhe. Ose Greqinë dhe Epirin e Veriut.

Shkurt ballkanas. Kur do i lëmë këto “kush e ka më të madh”, s`jemi më fëmijë.

Gjeniu i vogël: Pas Kosovës radhën e ka Çamëria. Pastaj Ulqini dhe Shën Naumi. Jemi një superfuqi e vogël (cit.).