[Flora dhe Fauna] Ujku dhe delet

Merr një njeri peng. Torturoje, përdhunoje, fyeje. Përsërite.

Thonë që ka mundësi të zhvillojë sindromën e Stokholmit. Pengu simpatizon pengmarrësin, një veprim sado i vogel i këndshëm i torturuesit zmadhohet dhe duket si një dashuri reciproke, kur në fakt është e njëanshme. Krejtësisht e njëanshme.

Psikologjia shkon shumë herë kundër logjikës së një njeriu të ftohtë, në dukje, por edhe sjellja më irracionale ka një shpjegim. Në këtë rast, në qoftë se një njeri mësohet të trajtohet gjithmonë keq, është e kuptueshme që këto grimcat e mirësisë t`i duken dashuri prindërore.

Tani zoom out. Shikoni gjithë këtë popullin tonë.

Është komplet e njëjta gjë. Një popull që është fyer dhe përdhunuar vazhdimisht, që nuk pretendon asgjë, nuk ngre kokë kurrë. Sepse Skifteri nuk beson se rrëzimi i sistemit komunist dhe rrëmuja e vitit `97 ishin revolta popullore.

Skifteri sheh popullin shqiptar, i cili shikon një rrugë të re që shtrohet, dhe në vend të mendojë që kjo është minimalja që mund të bëjë një qeveri dhe të kërkojë më shumë, kënaqet me kaq.
Madje as ja ka idenë çfarë duhet të kërkojë më shumë. Se është mësuar të mos ketë asgjë.

Tani, një pengmarrës që ka një peng të tillë, të dashuruar pas tij dhe totalisht irracional, pse duhet të ndryshojë  sjellje?

Maksimumi herë pas here në vend të bukës thatë i jep edhe pak djathë, duke fituar adhurim pa masë.
Skifteri mendon se nuk ka nevojë të shtojë më gjë.

Madje jo, edhe diçka tjetër: Nëse ke patur disa pengmarrës rresht, këshillohet të mos dashurohesh me pengmarrësin aktual thjesht sepse i mëparshmi të rrihte më shumë, ky i riu është diçka më ndryshe, e ka dorën më të lehtë.

Pretendo më shumë, shumë më shumë. Të paktën shpreh pakënaqësi konstante. Skifteri çfarë s`do jepte të shihte popullin shqiptar të votonte çdo 4 vjet për opozitën. Do ishte një sinjal i rëndësishëm, të paktën do thuhej “Ne nuk kënaqemi kollaj, nuk na merrni dot për idiotë, nuk mund të konfirmojmë pa marrë asgjë”. Në këtë mënyrë të paktën këta tipat do mendoheshin pak më shumë para disa veprimesh, se do kishte kosto politike.

Kjo kosto politike, Skifteri e thekson, këtu nuk ekziston.

Ata tipat aty lart janë të punësuarit e tu, jo anasjelltas, kur do e kuptojmë?

Gjeniu i vogël: Prandaj ja jap votën LSI, një alternativë ndryshe.