[Life style] Vesti la giubba

Të dashur miliarda e miliarda lexonjës,

Sot Skifteri do përdorë të shkuarën për të shpjeguar të tashmen. Nuk është mësim gjuhe, pa merak. Vijon në rreshtin tjetër (për Iksat).

Skifterit i kujtohet sikur ta kishte para syve mësimi i edukatës seksuale në klasë të tetë. Përveç faktit që vajzat dhe djemtë e bënin veç e veç, zysha evitonte në maksimum fjalët seks, penis dhe vaginë.

Por ama ato pak herë që përmëndeshin…te qeshura histerike me lot, nxënës të nxjerrë jashtë, të tjerët me kokën poshtë bangës për t`i shpëtuar zyshës. Ishte e pamundur ta mbaje, zysha po përmendte seksin! Të mos qeshnim?!

 1. Edukata seksuale në atë moshë u vlen vetëm 1% të shqiptarëve. Pjesa tjetër kur bën seks për herë të parë s`mban mend as që ka patur një lëndë të tillë.
 2. Një në gjashtë djem bindet të fejohet për të bërë seks. 
 3. 6% shkojnë deri te martesa. 

[Marrë nga Skifteri Progress Report, SPR]

Ishim në klasë në tetë, po thoja. Tani fast forward…

Jemi të rritur, të vaksinuar dhe na kap ligji. Jemi ulur për të pirë një çaj. Skifteri british mode on. Papritur ulet muzika dhe i ngrihet volumi televizorit. Dëgjohet zhurmë kaotike karrigesh dhe për 30 sekonda të gjithë janë drejtuar nga televizori. Bisedat lihen në mes dhe shtyhen për në orën 23:00.

Është e diel në Tiranë dhe ka filluar Portokalli.

Ka 1001 aspekte për t`u diskutuar këtu, parazitllëku, mungesa e aktiviteteve në Shqipëri, etj., por Skifteri është nisur me një qëllim preçiz dhe i duhet t`i përmbahet objektivit.

Po thonim për Portokallinë; ku është çelësi i suksesit?

Te aludimi për seksin. Dhe jo në mënyrën që seksi përdoret në marketing, as po flasim për "seksi shet". Shkurt, nuk po flasim për balerina me trup perfekt për të fituar audiencë. Po flasim për diçka shumë më primitive.

Shumica dërrmuese e batutave përfitojnë nga megakompleksi që kanë shqiptarët për seksin, kompleksi nr. 1 në Shqipëri. Abuzojnë madje. Në qoftë se je humorist në Portokalli dhe je në vështirësi, mjafton një “kujdes se u shqyve fare sa qeke hap” ose “më është ngritur…tensioni” dhe ke gjithë sallën duke u goditur me bërryla padashje nga të qeshurat, sheh fytyra të skuqura nga spazmat.

Në qoftë se herë pas here fut edhe ndonjë “fjalë të pistë”, dëgjohen njerëz nga publiku që bien nga karriget, nuk mund t`u besojnë veshëve, thjesht nuk e përballojnë dot. Mund t`ua thuash të njëjtën gjë javë për javë, prapë do meken.

Jo vetëm kaq, por do ja tregojnë njëri-tjetrit këto batuta – edhe në qoftë se e kanë parë të dy Portokallinë – duke qeshur njëlloj dhe do i fusin në zhargonin e tyre që të krijojnë një sens humori. Sa pa gjë...

Fiks si në klasë të tetë. Deja vu. 

U shpërndamë pak, të rigrupohemi…sic ka thënë edhe Skifteri në fjalimin e 5 maj 1887:

Mund të nxjerrësh njeriun nga fshati, por jo fshatin nga njeriu.  


- 6 nga 7 veta urrejnë Skifterin se i fyen në mënyrë të drejtpërdrejtë sistematikisht.
- 90% e këtyre po mendojnë "s`e ka me mua".
- 1 në 3 veta ka qeshur edhe kur ka lexuar fjalën "penis" të shkruar te ky post.

[Nga SPR]

Gjeniu i vogël: Na ishte njëherë nje lejlek, që kishte veshur një jelek, ku kishte qëndisur një lejlek.