[Flora dhe Fauna] Demi i tërbuar

 Para se të fillojmë kemi një lajmërim për të bërë:

Skifteri ka arritur të intervistojë një yll Hollywood-i, së shpejti këtu do të gjeni intervistën, rrini me ne!

....................................................................................................................

Kronika e zezë e një vendi tregon shumë për të, sidomos po të shikosh përveç numrit të krimeve, edhe arsyet që të çojnë aty. 
Për shembull, në SHBA kupton që armëmbajtja është faktor kryesor në numrin tmerrësisht të lartë të vrasjeve. Ose ndarja që në fëmijëri – fitues ose dështak – që krijon trauma. Ose izolimi i njeriut, që nga natyra është qenie shumë sociale, në qyteza të humbura ku distanca ndërmjet shtëpive është Elbasan – Librazhd.

Kalojmë te ne. Numri i vrasjeve këtu është i ekzagjeruar për numrin e popullsisë, por jo pa shpjegim. Varfëria në vend të parë si shkak, pa dyshim. Pastaj të tjerat, si për shembull koncepti shqiptar për nderin dhe sedrën. Ka akoma që vrasin për një sharje nga motra. 
Hanë 15 vjet burg ku poshtërohen, luajnë sapunash dhe de facto mbarojnë si njerëz, por nderi nuk u preket ama. Kur të dalin nga burgu do priten me duartrokitje.

Arsyet për kriminalitetin e lartë nuk mbarojnë këtu, por diskutimin do ta kanalizojmë. 

Duke qenë se varfëria do kohë të çrrënjoset dhe duhet të kalojnë breza derisa të mos dëgjojmë më vrasje për një sharje, Skifteri sugjeron një ndryshim që duket sipërfaqësor dhe pa lidhje me këtë fenomen, por që do të ulte jo pak numrin e krimeve. 
Tingëllon si një temë e parëndësishme kur populli ka halle të tjera, por pak veta kuptojnë që përfitimet do jenë të jashtëzakonshme:

Ky është legalizimi i prostitucionit. Shumë më i lehtë për tu realizuar se zhdukja e varfërisë.

Më poshtë gjeni përgjigjet që Skifteri ka dhënë në bisedat e tij me një kategori njerëzish të cilën ai urren; moralistët.

Moralisti 1: Pse do ndihmonte legalizimi?
Skifteri: Irritimi dhe agresiviteti që sjell mungesa e seksit është një fakt i pamohueshëm për këdo që ka lexuar dy rreshta psikologji. Një njeri i frustruar seksualisht do e nxjerrë inatin diku tjetër. Edhe një sekretare që ka kohë pa bërë seks me të shoqin ta nxin jetën, jo më një popullsi e tërë (sidomos) mashkullore që e vuan këtë gjë gjatë gjithë jetës. Kjo zgjidhje do relaksonte të gjithë shqiptarët. Çunat s`do dilnin më si ujq të uritur në kope duke ngacmuar çdo femër 14-48 vjeç.

Femrat, nga ana tjetër, do shikonin një ulje të kërkesës ndaj tyre sepse seksi për meshkujt s`do ishte më obsesion. Automatikisht do ishin më të hapura dhe kjo tabu do zhdukej. Shkurt, do kishim një kompleks më pak në nivel shoqërie dhe rrjedhimisht njerëz më të çtensionuar.

Moralisti 2: Po morali?
Skifteri: Shqiptarët gjithmonë janë munduar ta mbajnë të ashtuquajturin moral me dhunë se mos u ikën. Për shembull, ekziston frika se me prostitucionin e ligjshëm shumë burra do tradhtojnë gratë. 
Kjo është si të thuash që po e lejove gruan të dalë lirisht do tradhtojë, prandaj duhet kyçur në shtëpi. Ose duhet mbuluar. Do të thotë që ti e di shumë mirë që nuk po jeton me një njeri besnik, thjesht po e pengon fizikisht të të tradhtojë. Por ama po iu dha mundësia  e di ti…

Ja, ky është koncepti i moralit që kemi ne dhe shumë vende si ne. Mbyll dikë në kafaz dhe thuaj që është njeri shumë besnik. Madje që ke shumë besim. Anglosaksoni kësaj i thotë living in denial.

                     Moralisti duke predikuar

Pastaj, çka është e moralshme jo domosdoshmërisht është e jashtëligjshme dhe anasjelltas. Ligji s`të ndalon të tradhtosh gruan me motrën e vet, as të tallesh me një njeri derisa ta bësh të qajë, as një çun që mban të dashurën me lekë. 

Për të përdorur logjikën e moralistëve: Ashtu si një femër vendos të prostituohet se nuk ka zgjedhje, ashtu edhe shqiptarët ruajnë (në dukje) moralin sepse nuk kanë zgjedhje. Jepu zgjedhje dhe t`i shohim këta njerëzit e moralshëm.

Shkurt, në qoftë se prostitucioni mbetet i jashtëligjshëm për të shpëtuar martesën si institucion, kemi gjetur një zgjidhje false, hipokrite, duke luajtur rolin e budallait që mohon realitetin.

Moralisti 3: Prostitucioni ushtrohet vetëm nga halli, jo nga qejfi. Nuk duhet të ndërhyjë shteti duke e ndaluar?
Skifteri: Kjo është e vërtetë, shumë femra nuk zgjedhin të shesin trupin e tyre, e bëjnë nga halli, nga varfëria, se s`kanë çfarë të bëjnë tjetër… 

Po, edhe?! Pse një punëtor i komunales e ka patur pasion që i vogël të merret me pastrimin e rrugëve dhe ujërat e zeza? Po një hamall nuk shet në mënyrën e tij trupin? Apo ky ndoqi ëndrrën e fëmijërisë kur u bë hamall?

Pastaj, kur një vajzë prostituohet se nuk ka zgjedhje tjetër, ku ndihmon fakti që është e paligjshme?

Ku e gjen të drejtën të ndalosh dikë të vendosë çfarë të bëjë me trupin e vetë? Falas është ok të ofrosh seks, me pagesë jo? Pse?!

Moralisti 4: Skifter, po unë që s'jam bindur akoma?
Skifteri: Vazhdojmë atëherë.
Midis klientit dhe prostitutës ku është viktima? Kë po dëmton? Dakord, të kontrollohen dhe të mos lejohet shfrytëzimi nga tutorët, po a nuk është më e lehtë të bëhet kur është i ligjshëm? 
Në këtë mënyrë madje, policisë nuk do i duhet të bëjë dy punë, të gjejë ku është prostitucioni dhe të marrë vesh a janë shfrytëzuar vajzat nga tutorët. Do merrej vetëm me parandalimin e shfrytëzimit.

Prostitucioni ka qenë historikisht i ligjshëm, vetëm në 2-3 shekujt e fundit u kthye në tabu, për më tepër nga frika e sëmundjeve. Nuk ka mënyrë më të mirë për përhapjen e këtyre sëmundjeve sesa të inkurajosh një prostitucion të fshehur, larg kontrolleve.

Pastaj, ky shteti që kujdeset kaq shumë për qytetarët e vet lejon alkoolin, duhanin dhe sidomos kumarin por jo prostitucionin? Kush dëmton më shumë? Shteti, kur sheh që këto gjëra do ekzistojnë gjithmonë, tregohet i zgjuar, i legalizon dhe vjel taksa, më mirë sesa të harxhojë resurse për t`i luftuar më kot.

Moralisti 4 lakonik: Atëherë?
Skifteri: Po kujt t`ja thuash, talebanëve të moralit. Ata që preferojnë njerëz të stresuar, të irrituar, nervozë, jo tolerantë, gati për të shpërthyer nga mungesa e një nevojë jetësore fiziologjike…por me nderin në vend.

Ne jemi masturbuesit e Europës që të vrasim për një fjalë goje, por krenarë për namuzin.

Dhe një gjë të fundit; e dimë shumë mirë që do legalizohet herët a vonë, siç po ndodh në shumë vende, duhet patjetër të presim çka për të thënë Turqia në lidhje me këtë që të ecim dorë për dore së bashku drejt një bote plot namuz?

Madje mund ta shikoja edhe një spot për Shqipërinë, me slogan tipik reklame shqiptare: “Shqipëria, aty ku bukuria prek namuzin”.

Selling is legal. Fucking is legal. Why isn`t selling fucking legal? (SPR 2011)

PS: Te ky shkrim përjashtohen të gjitha marrëdhëniet nën rrogoz në ambiente pune, tradhtitë masive bashkëshortore nëpër fshatra dhe konviktoret që shesin veten për një drekë. Këto janë teori konspirative të atyre që na duan të keqen, grekë, serbë, antishqiptarë në përgjithësi. S`kemi parë ndonjëherë nga këto.

Skifter Tolstoi

Gjeniu i vogël: Femrat me perçe s`duhen paragjykuar, është zgjedhja e tyre, e bëjnë me dëshirën më të madhe.