[Flora dhe Fauna] Pemët pa kokrra

Para se të fillojmë kemi një lajmërim për të bërë:

Stafi i Skifterit ka arritur të intervistojë një yll Hollywood-i, së shpejti këtu do të gjeni intervistën ekskluzive, rrini me ne!

....................................................................................................................

Prej ditësh në qytetin e veçantë të Tiranës ka nisur një fushatë sensibilizuese kundër dhunës ndaj grave.

Në qoftë se kjo fushatë nuk është hipokrite, atëherë është idiote. Po e heqim menjëherë dyshimin. Po, edhe Skifteri është kundër dhunës ndaj grave, vetëm se ka bindjen se dhuna ndaj grave luftohet ndryshe. Është një temë që e ka prekur dhe Vagabondi te kënga "Nënat shqiptare", por që nuk është thelluar.

Le të themi dy fjalë për këtë fushatë. VIP-a të njohur nga fusha të ndryshme u bëjnë thirrje nëpërmjet videoklipeve dhe broshurave burrave shqiptarë të mos rrahin gratë.

"Mendoj për atë tipin inferior në shoqërinë tonë, që në shtëpi rreh gruan e tij me zemërim të papërmbajtshëm. Familja duhet mbrojtur, mos e shkatërro vetë ti duke dhunuar gruan, bijën, motrën", thotë Redi Jupi, ish kapiten i ekipit Dinamo (http://www.youtube.com/watch?v=iyaFPFT6weM).
Të vihemi pak në vendin e burrit të dhunshëm që shikon videoklipin: "Unë inferior? U më **** kockën. Grua, mos je ankuar gjë në televizor? S'ke faj ti...".

Padashje, Redi Jupi u drejtohet burrave që nuk i rrahin gratë duke u bërë thirrje të mos bëhen të dhunshëm. Njëlloj, si mësuesi që u bërtet nxënësve që janë në klasë për të tjerët që kanë lënë orën e mësimit.

Kot që më ndjek, se nuk është se kam ndonjë ide!

"Lale, trego dhe ti që je kundër dhunës ndaj grave!", thotë një rapper i njohur në një broshurë. Patjetër, po patë një djalë të pashëm, që reflekton zgjuarsi dhe që mban një bluzë me shkrimin "unë jam kundër dhunës ndaj grave" ai është Skifteri.

E megjithatë, këto janë thjesht një realizim i dobët. Problemet më të mëdha fushata i ka në thelb.
VIP-at e tjerë vënë në dukje se sa e rëndësishme është gruaja dhe sa e dëmshme është dhuna. Atëherë duhet parë se çfarë efekti kanë këto mesazhe te burrat e dhunshëm. Duke njohur shqiptarët, burrat e dhunshëm janë dy llojësh. I pari është lloji i burrave patriarkë të cilët janë edukuar me një konsideratë të ulët për gratë. Ata kur rrahin gruan kanë të njëjtën ndjesi kur rrahin bijtë se kanë bërë faj. Në qoftë se për këta bëhet fushata, goditja ka dalë huq sepse këta vështirë se e kanë parë spotin ose fletushkat që shpërndahen në Bllok.

I dyti është lloji i burrave që janë të prirur të bëhen të dhunshëm prej ngacmimeve të ndryshme që mund të marrin gjatë ditës. Arsyet mund të jenë pafund: pasiguria dhe dëshira për tu ndjerë burrë, alkooli, stresi nga mungesa e lekut, xhelozia, etj. Këta burra, po ti shikosh në kafe, nuk janë të ngrysur, mund të jenë të veshur me kollare dhe nuk e kanë të shkruar në ballë që janë të dhunshëm. Ata e dinë të gjithë e dinë se gruaja është e bekuar nga Perëndia dhe se dhuna është e gabuar. Madje, kur bëhet fjalë për të tjerë, ata dënojnë dhunën ndaj gruas. Vetëm se kur vjen momenti i krizës, aty ku nuk mbajnë më nervat...

"Ç'do ta rraf se ma bëri për borxh! Pa dale! Si do t'i dal përpara Redi Jupit? Po Alket Islamit?". Ky është efekti i shpresuar?

Nëse duam vërtetë ta parandalojmë si fenomen le të gjejmë cilat janë shkaqet që çojnë në këtë dhunë dhe ti bllokojmë. Të punojmë të pakësojmë konsumin e alkoolit, të ndihmojmë familjet e varfra, të inkurajojmë njerëzit të këshillohen te psikologu. Fondi i fushatës le t'u jepet grave të dhunuara nga burrat. Shumë gra nuk divorcojnë sepse varen ekonomikisht nga burrat. E shumë e shumë veprime të tjera që do pakësonin këtë plagë.

Tu bëjmë thirrje njerëzve për të larë gojën dhe ndërgjegjen ta kemi të pastër, është më e lehta që mund të bëjmë. Por edhe në Bibël thuhet mos e shiko gruan e tjetrit, po ne pse vazhdojmë ta shikojmë? Dhe mos thoni që Bibla nuk është promovuar.

Gjeniu i vogël: Nëse votojnë gratë, pse të mos votojnë dhe fëmijët?