[Flora dhe Fauna] Pemët

Të dashur miliarda lexues,

Sot Skifteri do ju prezantojë – ose do ju rikujtojë më mirë, sepse do të ndajë acarimin me ju, çdo veprim ka qëllime egoiste  – njerëzit që mendojnë dhe flasin njëlloj. Këta janë ata që nuk dalin kurrë nga mendimi i përgjithshëm, preferojnë sigurinë që sjell një cliché (sepse e ka menduar tjetërkush më parë, kot s`është bërë cliché) dhe duan të ndihen gjithmonë pjesë e një grupi, mundësisht nga ana e shumicës.

Këta, në qoftë se s`është kuptuar akoma, janë njerëzit banalë dhe për fat të keq (apo logjikisht?) janë shumica.
 
  1. Njeriu banal adhuron dialogun “të dua – edhe unë”, ndonjëherë kur ndihet kreativ mund të shkojë edhe te “unë të dua më shumë seç më do ti mua”, mundësisht në sms sepse ka patur kohë ta mendojë, me një shkelje syri si emoticon që rrezaton krenari. Kur hapen diskutime rreth kësaj teme, nuk mungon dashuria që është e verbër, që s`njeh moshë, apo njeriu që po s`dashuroi s`ka jetuar.

Skifteri u jep njerëzve banalë këshilla për jetën

  2. Njeriu banal dëgjon dy veta që diskutojnë për politikë, shikon nivelin e argumentimit, pastaj shikon veten…e pamundur të kontribojë. Çfarë duhet të bëjë? Shumë e thjeshtë, kush është shprehja më e rrahur dhe njëkohësisht thuajse e pakontestueshme?

Ah po, “të gjithë hajdutë janë këta tanët po hë”. Shoqërohet zakonisht me shikim largpamës dhe ton keqardhjeje për situatën. Kur ka një cigare që të ndajë fjalinë në mes dhe të picërrojë sytë sikur po mendohet akoma më mirë, ndonjërit madje mund t`i duket edhe i thellë. Ose sikur kjo fjalia ishte maja e ajsbergut, sepse ai thjesht përton të shpjegojë.

   3. Njeriu banal vdes të përdorë sa më shumë fjalë më origjinë latine të cilave nuk ua di ekuivalentin në shqip dhe fjalë që mbarojnë me -isht; kualitet, atraktiv, adaptohem, faktikisht, absolutisht, kryesisht, etj. I thekson aq shumë në fjali sa duket sikur ka zgjidhur ndonjë problem dhe po shpëton jetë njerëzish. Po ta lësh mund të eksitohet nga monologu dhe rrezikon të degjosh fjalë si ekstremisht, kompleksitete e shpikje të tilla.

 Fundi i pjesës së parë.

“Njeriu Banal” do jetë serial dhe si çdo telenovelë e bërë mirë do ndërpritet gjithmonë në crescendo. Skifteri në marketing ka marrë dhjetë, di ç`bën.

 Tani…surprizat e Skifterit s`kanë të sosur. Sot deklarojmë të hapur rubrikën tonë më të fundit (meqë ra fjala, nuk mjafton të thuash “e fundit”? Duhet “më e fundit”?):

Këndi `Gjeniu i Vogël`, ku çdo ditë do ketë një perlë që na ka kapur veshi nga bashkëqytetarët tanë. Betohemi mbi kushtetutë që nuk do gënjejmë, çfarë do shkruajmë do e kemi dëgjuar vërtet.

E inaugurojmë pa humbur kohë!

Këndi `Gjeniu i Vogël`: Kush është Hipokrati? Hipokrati është një njeri shumë hipokrit.