[Life style] Kur dëgjon zëthin e s’ëmës

Nuk mund të mos vihet re që diçka ka ndryshuar në jetën e shqiptarëve. E para, disa hapa të ndrojtur po bëhen drejt Bashkimit Europian dhe e dyta, telenovelat turke kanë hyrë fuqishëm. Koinçidencë ose jo, këto dy procese e kanë marrë Shqipërinë per dorë dhe po e çojnë.... Ku po e çojnë?

BE - Kusht themelor për integrimin e Shqipërisë janë të drejtat e njeriut.
TV Klan - Gymysh, Menekshe dhe Halili, si dhe EZEL.
AS - Sulejmani i Madhërishëm për 100 vjetorin e pavarësisë.
Me këtë rast po ju zbuloj një surprizë: së shpejti do fillojë "Fatmagül'ün suçu ne" (Çfarë faji ka Fatma e bukur) i cili po bën namin në Ballkan.
Për asnjë moment nuk kam menduar se kanë faj TV Klan dhe AS. Edhe une do i kisha shfaqur me këtë audiencë të çmendur. Po ç'i ben njerzit t'i ndjekin kaq shumë?

Beautiful (SHBA), Celeste (Argjentinë), Paloma (Meksikë) dhe Zhadja (Brazil) kjo është trajektorja e telenovelave në vendin tonë, por në fund të fundit xhani na do Turqinë. Përpjekjet e njeriut që lufton perditë për dashurinë nuk mjaftojnë për shikuesin shqiptar. Duhet që halla dhe daja të jetojnë nën të njëjtën çati, tre kurora në një shtëpi. Burri duhet të rrahë gruan se doli te oborri i shtëpisë, babai të rrahë të bijën sepse nuk martohet me atë që i dikton ai, femra e përdhunuar duhet të ndërrojë fshatin sepse shikohet si e përdalë.

Vetëm në ketë mjedis shqiptari fillon të ketë deja vu, fillon të hyjë në empati me personazhet dhe ndihet i aftë të japë një gjykim të drejtë: "Vajza ka të drejtë se e do djalin, por ja dhe babai i shkretë ç'ti bëjë opinionit". Çfarë jepet në telenovela është vetëm “Hyrje në Turqi”. Kapitujt e tjerë i shohim në lajme. Përdhunime në familje, prerje kokash, vrasje në gjumë. Shkaku madhor është xhelozia.

Burra të nderit shqiptarë, që e doni të dashurën e virgjër dhe gruan mundësisht papunë! Shiheni veten në pasqyrë! Jeni njëri prej Ezelit, Reshatit, Mustafasë ose Qerimit! Zgjidhni e merrni!
Nga balta ku jemi zhytur prej 500 vjetësh s'mund të shkulemi përveçse po na tërhoqën prej flokësh.