[Meteo] Skifteri në shtrat e sipër

Sot nuk paska ditë-natë në Tiranë, vetëm natë-natë. Aq natë-natë sa zgjimi ishte haluçinant, brenda 3 minutash gjithë këto versione u propozuan, shqyrtuan dhe u hodhën poshtë:

1. Majat paskan patur të drejtë, kemi bërë skeptikun kot. Po prapë…sikur dukej për fëmijë…pale, jemi të kufizuar, majat e dine.
2. Kam ngatërruar orën e alarmit.
3. Jo, qenka gabim ora e telefonit.
4. Jo, do jetë ora 7 pasdite dhe është fundjavë, me kë e kam lënë për kafe unë tani? Ta anulloj? Si e kam regjistrin e anullimeve për arsye idiote me këtë?
5. Nuk e di, po duhet të çohem.
6. Prit dhe 5 minuta sa të kuptoj çfarë po ndodh, pastaj do çohem.
7. Edhe 5.

Siç shohim, të dashur miliona lexues, gjykimi bëhet më i kthjellët me çdo sekondë që kalon. Aq i kthjellët sa mendova – saktë – që ky zgjim do përsëritet kushedi sa herë në muajt në vazhdim. Po në fakt kjo
ishte thjesht hyrje që vështirë t`i interesojë njeriu.

Çfarë më bën vërtet përshtypje është kjo:

Si ka mundësi që Tirana në shi duket si qytet në evakuim e sipër?

Pellgje, ndërtesa të ngjeshura gri ose të dala boje, supertrafik, bori makinash stil dasme, ambulantët që kanë hedhur qese mbi paketat, xhepistat e Kinostudio-Kombinat me buzëqeshje të stampuar në fytyrë,
njerëz të stresuar në kulm.

Të gjitha këto sepse thjesht po bie shi. Do jetë ngaqë ne jemi ballkanas, jemi solarë dhe s`e durojmë dot një mot që i shkon ndesh natyrës sonë.

Po prapë sikur mbaj mend vende të tjera me shi ku kam qenë, ku, përveç rasteve të rrebeshit, mjaftonte një çadër dhe mund të dilje pa mallkuar veten njëqind herë. Atëherë do jetë sindroma kur gjëja e tjetrit
të pëlqen më shumë a priori.

Po ankohem kot, se ka lokale shumë të bukura në shi. Lokali – zgjidhja për çdo problem në Shqipëri. Ca vdes shqiptari i shkretë për të parazituar në lokal, shkon bie edhe shi që “ta detyrojë” të ulet aty.

Duke shkruar e gjeta më në fund çfarë kisha në mendje të përmbledhur, pa lodhur njeri.

Ajo që mendoj është kjo:

E keqja e këtyre ditëve është se gjatë kësaj periudhe njerëzit këtu nuk jetojnë, mbijetojnë. Presin të kalojnë këto ditë derisa të dalë dielli.

E keni parasysh që zakonisht kjo më lart përdoret si metaforë? Imagine.