[Survivor] Parabolë

Sot Skifteri do ju flasë për jetën tragjikomike të Iksit. Iksi qesh gjithmonë i fundit, jo sepse del gjithmonë fitimtar, por ngaqë... e kap me vonesë. Ndonëse ndër shokë i kap i fundit situatat, Iksi e kuptoi i pari se në gjuhën shqipe shprehja "qesh mirë kush qesh i fundit" ka hyrë gabim. Qesh mirë kush qesh në fund dhe jo i fundit.
Iksi mban mend se kur ishte i vogël qeshte e gajasej në një kohë me shokët. Po kjo zgjati deri kur mbaruan barcaletat me Nastradinin. E mban mend si sot herën e parë kur qeshi me vonesë. Askush s'ia vuri re, madje qeshën dhe njëherë me të. Mirëpo situata filloi të përkeqësohej. Shokët qeshnin sa qeshnin pastaj kthenin sytë dhe veshët nga Iksi për të pritur jehonën. Njëherë, pas një barcalete u ngrit nga tavolina dhe bëri sikur iku në banjo ku ia shkrepi gazit. Qeshi sa qeshi vetëm dhe pastaj u kthye përsëri te shokët.
Do të dëshironte shumë të mos i vinte për të qeshur, por pasi i kuptonte, disa barcaleta ishin vertetë gazmore dhe ai s'e mbante dot të qeshurën. Aq shumë u kompleksua sa filloi të shtirej sikur i kuptonte me të parën. Po as kjo nuk qe një punë e lehtë. Sa herë që fillonte një barcaletë ai ndihej si vrapuesi në nisje duke pritur shkrepjen e startit. Pasi dëgjonte dy-tre të qeshura atëhere bënte dhe Iksi sikur qeshte. Më pas, kur e kuptonte vërtetë shakanë qeshte prapë duke u thënë se iu kujtua ai "muhabeti".
Problemin më të madh e kishte kur gjendej vetëm për vetëm me shokun që tregonte barcaletën, sidomos para Ypsilonit, ai i kishte shumë të forta. Lakuriq si para pasqyrës, një ditë ia rrëfeu hallin shokut dhe iu lut: "A ka mundësi t'i tregosh barcaletat më ngadalë?". "S'është puna fare aty", ia kishte prerë shkurt Ypsiloni. "S'është puna fare aty", përsëriti me vete Iksi. "Po ku është pra puna? Ky s'e kupton që unë i kap me vonesë? Atëhere pse më flet si misterioz?". Iksi ishte në hall të madh. Nuk është se anët e tjera të jetës po i shkëlqenin. Vonesa ku nuk e kishte nxjerrë kokën...

***

Një ditë Zeti i tha diçka që do i ndryshonte jetën përfundimisht. "Ti ke nevojë të yshtesh!". Yshtja tingëlloi pak çuditshëm në veshët e Iksit... nuk ishte mësuar ta yshtnin. "Të yshtem. Më yshtën. Të yshtën. E yshtën. Tani më duket si fjalë pa kuptim. Në djall të vejë! Po shkoj të yshtem!".
Te dera e fallxhores kishte vetëm gra. Të gjitha kishin hall fati. "Me fatin s'kam qenë keq", mendoi Iksi aty për aty. Sekserja e fallxhores ishte një mesogrua pak shurdhe.
- Si e ke hallin?
- Qesh me vonesë.
Sekserja u mek duke qeshur:
-Pse mor çun? Ku ta gjesh te vish me vonesë...
Kur e thirrën brenda Iksi u habit që fallxhorja ishte burrë, domethënë fallxhor. Në mendjen e tij (dhe jo pa të drejtë) kjo ishte punë për gra. Pastaj u kujtua se emri Rixha që kishte parë te reklama e fallxhorit mund të lexohej dhe Rixhá i cili ishte emër burri. Si s'i kish vajtur mendja më parë?
- Më tha Drita që s'mbaron kollaj - i tha fallxhori me qesëndi. Me fat si ke qenë?
- Mirë, dhe ndonjë lloto e kam kapur...
Fallxhori qeshi. Në atë moment Iksi kuptoi se sekserja Drita s'e kishte dëgjuar mirë (shurdhja e mallkuar!) dhe se gratë që prisnin në radhë donin burrë. E mblodhi veten dhe vazhdoi:
- Problemi im është se qesh vonë, i kap gjërat me vonesë.
- Ama këtë hall paske ti more djalë? E di sa ka si puna jote? Të gjithë bëjnë sikur kuptojnë dhe qeshin kot, vetëm se e maskojnë më mirë.
Fallxhori ia shpjegoi me detaje gjerësinë dhe thellësinë që kishte marrë fenomeni. Disa fakte e lanë Iksin me gojë të shqyer nga habia. Në fund fallxhori i tha:
- Ky është një trend i ri. Po ta kesh vënë re nëpër televizione kanë filluar të dalin gjithmonë e më shumë njerëz si ti. Nëpër vende drejtuese po vënë njerëz si ti. Në qeveri kanë filuar të vënë njerëz si ti...
Iksi doli nga shtëpia e fallxhorit me zemrën mal. Jeta i dukej e gjatë dhe e gjerë. "Në fund të fundit e paska pasur mirë shqiptari: qesh mirë kush qesh i fundit. Qënkam në rrugën e drejtë!".

Bazuar mbi një histori të vërtetë.

Ypsiloni, sot është kasap te pazari i ri.
Zeti, vdiq nga overdoza.
Fallxhorit i bënë voodoo.
Dritës i erdhi mrekullisht dëgjimi dhe u bë një kompozitore e suksesshme.
Iksi punon drejtor i marrëdhenieve me jashtë në ministrinë X.
Skifteri u bë bloggeri më i suksesshëm në botë.

Gjeniu i vogël: Në çfarë gjinie është fjala "çanta"? Çanta është në gjininë asnjëanëse, sepse ka çanta për femra dhe çanta për meshkuj.