[Flora dhe Fauna] Homo iners ignavus piger

Nëpër paketat televizive, përjashto emisionet me lajme live (që pesë minuta mos t'i shohësh, kushedi se çfarë ndodh në Shqipëri), gjithmonë e më shumë kanë filluar të zënë një vend të rëndesishëm edhe programe me kafshë të egra të Animal Planet, National Geographic, etj. Emisionet ngjallin kuriozitet sepse të vënë në mes të aksionit. Gjuetia e luanëve, migrimi i bizonëve, gjarpri gjatë katër stinëve, riprodhimi i akrepave, grindja e babuinëve. Kurse njeriu u largua aq shumë nga natyra, sa kur sheh në TV shfaqje të tilla herë-herë thërret "Ej, shiko! Këtë e bëkan fiks si ne! E habitshme". Eshtë komenti bujar që specia më e zhvilluar e planetit bën për kolegët e saj.

Edhe Skifteri duke eksploruar florën dhe faunën nëpër postet e tij për pak sa nuk kreu të njëjtin neglizhim naiv. Skifterizmin s'duhet ta harrojmë për asnjë çast, kështu që sot do merremi pikërisht me njeriun. Dhe jo me njeriun dosido, por me nënspecien më të fundit. Po le ta marrim hap pas hapi.

Aftësimi. Kur një pelë pjell një mëz, ky i fundit pasi çan placentën, sheh njëherë vërdallë si kumarxhiu që s'di kë të zgjedhë të kuqen apo të zezën, por kur sheh nënën qetësohet (shumë i rëndësishëm si detaj). Pastaj fillon me dy-tre përçapje të çohet në këmbë. Pas disa orësh ia ka futur vrapit. Për një javë ka mësuar galopin, revanin dhe vertikalen në mur.

Po njeriu? Nja dy vjet të mira fëmija s'i flet me gojë nënës. Marrëdheniët e tyre janë zakonisht qarje-qetësim, qarje-qumësht gjiri dhe qarje misterioze. Kur aty nga mosha 2 vjeç, bebja gjysmë këmbadorazi gjen një gotë me ujë dhe e rrëkëllen, prindi thërret i mallëngjyer "Ua, sa i zgjuar! E pe si e gjeti vetë ujin? I ka ngjarë babit". Kur pastaj nga mosha 4 vjeç fëmija futet vetë në hije se e përcëllon dielli, nuk ka më pikë dyshimi. Gjeni.

Riprodhimi. Duhet që toka t'i vijë nja dhjetë herë vërdallë diellit që njeriu të jetë i aftë të pjellë. Megjithëse në pamje të parë duket sikur natyra e ka vonuar njeriun, asnjeri (asnjë njeri) s'duket të shqetësohet shumë, përkundrazi. Është shumë herët. Pasi të mbarosh fakultetin thotë prindi që e di më mirë se natyra, që do të thotë pasi të jesh 22-23 vjeç. Sikundërse duhet të jetë dhe njeriu i duhur që s'është e thënë ta kesh gjetur fiks në atë moshë, kështu që të mos nxitohemi. Së fundmi, njeriu duhet të bëjë dhe pak karrierë kështu që dhe po e le pas të tridhjetave është normale...

Ushqimi. Një kafshë fillon siguron vetë ushqim jo më vonë pasi është formuar fizikisht. Te njeriu puna e ushqimit është pak delikate dhe këtu arrijmë tek shënjestra jonë, njeriu që rri në shtëpi me mamin. Duke qenë se gojë të liga akuzojnë Skifterin për maskilizëm (?!), le të marrim për ilustrim njeriun mashkull që rri me mamin.

Një nënë duke inkurajuar të birin para finales së Counter Strike

Të shuajmë menjëherë çdo keqkuptim. Çuni që rri me mamin, nuk është çun mamaje. Madje madje Skifteri Progress Report sinjalizon një rritje të lacave që jetojnë me mamin. Nuk ka asnjë kontradiktë. Thjesht "35 vjeç po nuk lehet plaka vetëm, o' pun rrespekti".

Një çun tipik që rri në shtëpi me mamin, është duke parë televizor këmbë mbi këmbë. Herë pas here thërret: "O ma/o none/o plake na sill çik ujë". Kur kthehet nga jashtë: "Ça ka për t`ongër?". Më keq se këta janë çunat që rrinë me gjyshen. Asaj i bëjnë zbor, sikur ka punë tjetër gjyshja?
Me shokët shpalos njohuritë e tij në gjueti femrash, ngarje makinash dhe presion para sherrit. Me të dashurën, plane dhe projekte për hotele, motele ose shtëpi shokësh për një dyorësh. Me babain, muhabete sporti, po pse jo dhe makina, sherret, femrat.

E pse e gjitha kjo? Sepse ushqimi është i siguruar. Vërtet njeriu është lloji më i zhvilluar, por Skifteri ka përshtypjen se jo të gjithë njerëzit kanë kontribuar për këtë. Disa prej tyre thjesht janë në anën e fitimtarëve, madje janë duke bërë hapa prapa. Edhe një kinez mund të jetë krenar se i përket popullit më të madh në botë, po ku është merita e tij këtu?

Provokimi i dytë, lidhet me "daljen në jetë". Pa i hyrë historisë, traditës, sociologjisë, psikologjisë, sportit, kulturës, turizmit dhe shanseve të barabarta, sikur ta fillonim nga zero, pse të mos punonte njeriu që 14 vjeç, të kishte fëmijë, të votonte. Kështu mund të evitoheshin 40 vjeçarë që sillen si fëmijë. Në fund të fundit, Aleksandri i Madh në moshën 16-vjeçare udhëhiqte ushtrinë në luftë, në moshën 22-vjeçare kishte pushtuar gjysmën e botës.

Gjeniu i vogël: Sado që je gangsterrr mos u bëj gangsterrr me mamin.