[Skifteri edukon] Sipas një studimi të fundit të...

I dashur lexonjës,

Disa marka qumështi dolën me nivele të larta aflatoksine, kështu që kini shumë kujdes. E dimë që këtu s`kontrollohet gjë, kështu që edhe markat e tjera që nuk u përmendën duhen evituar. Nga ana tjetër, në SHBA janë shumë më tolerantë me aflatoksinën. Nejse, më mirë e merr te fshatari. Jo, se fshatari i shton ujë. Pastaj aflatoksina gjendet në mënyrë natyrale te qumështi, e merr lopa nga bari, s`ke ç`ti bësh. Vallahi më mirë e rrallon pak qumështin se s`ka vdekur njeri pa qumësht, po e di që shpëton nga kanceri. Amon, kur s`na ka gjetur gjë deri tani s`ka për të na gjetur gjë, e di ti që kur shpëtheu Çernobili, në Shqipëri kishte bollëk qumështi kur gjithë Europa po e flakte…koinçidencë? Kemi fituar imunitet ne shqiptarët, pastaj të gjitha këtu copë-copë janë, se mos ngeli puna te qumështi. Pastaj këto llafe i nxori konkurrenca. E vure re që qumështi shqiptar dhe serb doli me aflatoksinë të lartë kurse qumështi kosovar doli në rregull? Kush e ha këtë? Këta kosovarët…

Pastaj do bësh shumë kujdes me ujin, pi vetëm Tepelena. Jo, Tepelena është skandal, bie shumë rëndë, të shkakton gurë në veshka. Qafshtama po, ujë i lehtë pranveror. Jo, këtu në Shqipëri uji në përgjithësi është shumë i rëndë dhe nuk të bën mirë për shëndetin, pi vetëm Panna Italian, ke për ta parë si do ndihesh. Amon më se edhe këta plehrat kushedi ku i mbushin, ujë është, shqiptari çfarë s`ka pirë, kot tani bëjnë të gjithë si të sofistikuar.

Për të shkuar në Pogradec është mirë t`i biesh nga Përmeti për te evituar Elbasanin

Pastaj ki kujdes me mishin që vjen nga Maqedonia ose Mali i Zi plot me hormone, viçi me përmasa elefanti, ata që rrisin viça vendi i ndërrojnë me fqinjët 1 me 2, pastaj mishi që përdoret për qofte vjen nga Uruguaj. Pastaj doli skandali i mishit të kalit në Europë, jo më këtu që s`ka pikë kontrolli. Po mishi i kalit s`është më i shtrenjtë njëherë? Pale, s`do jetë kalë race ky i infiltruari. Më mirë ha mish pule të jesh brenda. Jo, se pulat janë për vete të rritura me hormone dhe vijnë nga jashtë, e ke vënë re sa shtrenjtë është pula e fshatit? Ok, shumë mirë të jetë shtrenjtë, po të paktën të kesh siguri që është pulë bio. Nga ta dish? Nejse, po hëngre rrallë s`të gjen gjë. Ose tamam tamam më mirë bëhesh vegjetarian dhe toleron vetëm te peshku. Po cili peshk? Ha barbun se ai me siguri nuk rritet në rezervat. Është peshk pa lidhje? Merr peshk të egër atëherë, e dallon dot? Ha fruta deti, i ke parë japonezët sa jetëgjatë janë? A, thonë që vijnë të ngrira edhe ato? Lëri fare dhe ha fasule për të rekuperuar proteinat që s`do i marrësh më nga mishi dhe peshku.

Pastaj proteinat i merr nga djathi…a, jo se dalim prapë te qumështi. Pastaj baxhot në Shqipëri kanë kushte higjene të tmerrshme, nuk u kihet besë. Për mua vetëm perime-zarzavate. Nga ndryshon perimi nga zarzavati njëherë? Nejse, ç`rëndësi ka kjo, rëndësi ka që me këto je i sigurt. Jo, nuk je, edhe këto rriten në mënyrë artificiale, thonë që fshatari ka një parcelë të vogël që rrit perimet për vete, e cila është bio, pjesës tjetër çfarë s`i hedh, ajo është çfarë ha ti, duhet evituar. Thonë që kastravecat e vegjël i fusin në një thes në darkë bashkë më një lloj ilaçi, të nesërmen kastravecat kanë dhjetëfishuar përmasat, janë bërë kastraveca Senegali, për tu ngrënë janë këta? Po sallata jeshile që rri 2 javë në supermarket dhe po jeshile mbetet? Hahet ajo? Po frutat që janë të së njëjtës madhësi i ke parë? S`ka më mollë të vogla dhe të mëdha, janë të gjitha njëlloj, as duhet ti zgjedhësh më. Tani janë të gjitha domate zemërkau, jo jo jo, nuk preken me dorë, janë edhe pa shije mes të tjerash.

Jo jo, as këto frutat dhe perimet nuk hahen, gjëja e vetme e sigurt janë brumërat, atyre s`kanë çfarë t`u bëjnë. Jo, brumërat evitoji sa më shumë sepse shumica dërrmuese e miellit në Shqipëri vjen nga Ukraina dhe Rusia dhe është toksik, prandaj e marrim kaq lirë. Edhe bukën rralloje, ha makarona që vijnë nga Italia. Të paktën e di që janë të sakta. Ok, s`kanë shumë vlerë për shëndetin, po shëndetin e bën me mënyra të tjera, nuk bazohesh vetëm te ushqimi. Dil për vrap, ajo të zgjat jetën. Po, por të dëmton kaviljen dhe gjurin, më mirë bëj step në palestër. Po në palestër mungon ajri i pastër. Po se mos është më i pastër ajri i Tiranës, i ke parë nivelet e ndotjes disa herë më të larta se nivelet e lejuara? Nuk të gjen gjë nga ajri, po mos pi cigare, jo për gjë, po bëhen në Librazhd dhe çfarë nuk i fusin brenda, kashtë, pi që pi, porositi jashtë me të dredhur. Po pive duhan të pastër s`të gjen gjë, gjyshi im ka pirë që 9 vjeç dhe vdiq 99. Po mos pi shumë kafe, kjo po s`të bën mirë. Jo, dëgjova në radio që sipas një studimi të fundit të bëjnë shumë mirë edhe 3 kafe në ditë, për qarkullimin e gjakut dhe mëlçinë. Po, por kafja krijon problem tensioni.

Dhe pas gjithë kësaj overdoze informacioni, të dashur lexues, çfarë dëgjon?

Që stresi është burimi kryesor i çdo sëmundjeje.

Prandaj Skifteri ngre në piedestal shprehjen e pavdekshme:

Ndonjëherë është për tu patur zili IQ e këtij tipit

IGNORANCE IS BLISS.

PS: E keni vënë re që në Shqipëri "nuk të gjen gjë" lidhet vetëm me vdekjen? Po nuk vdiqe domethënë që s`të ka gjetur gjë.

Gjeniu i vogël: I kam zili ata që jetojnë nëpër fshatra malorë, hanë bio, ajër i pastër, ujë kristal.