[Survivor] Jeta e rehatshme brenda një guaske

Lexonjës dhe lexonjëse,

Skifteri do ndajë sot me ju takimin e tij me një shok fëmijërie, i cili prej vitesh është konvertuar në të krishterin më të devotshëm që Skifteri njeh. I virgjër, i panjollosur nga mëkati, i pastër si çarçafët e një moteli, do ta quajmë Beni, pavarësisht se ka tjetër emër.

Pas pyetjeve të përgjithshme të tipit "Puna mirë? Aty vazhdon?", Beni dëgjoi disa kënaqësi tokësore të Skifterit duke buzëqeshur në mënyrë diplomatike, para se të fillonte me axhendën e tij.

Kështu, Beni me shumë stil aludoi që Skifteri ishte i cekët, jetonte në errësirë totale dhe kishte nevojë të shihte dritën sa më shpejt, duhej shpëtuar. Skifteri ishte një shpirt i humbur të cilit Beni do i jepte një kuptim.

Skenë nga një film rreth Jezusit

Skifteri pyeti direkt me naivitet fëminor; në qoftë se s'vazhdohet më kështu pse duhet të zgjidhte pikërisht këtë rrugë, ose, që të hyjmë tamam në temë, pse këtë Zot kur ka qindra të tjerë? I kishte ekzaminuar Beni të gjithë të tjerët që zgjodhi këtë? Çuditërisht jo...ky Zot ishte i pari që kishte dalë. Hmmm...të gjesh Zotin e saktë është sfidë brenda sfidës.

Beni pastaj tha që ndihej shumë mirë, që Skifteri as e imagjinonte dot gjendjen e qetë shpirtërore të tij, komfortin që ai gjente te Zoti, asnjë problem nuk e shqetësonte se ai kishte Zotin...Po Beni, po asnjë nga këto nuk e bën të vërtetë. Iluzionet të ndihmojnë, gjithmonë kanë ndihmuar njeriun të ndihet më mirë, po mos ta shkelim.

Pastaj Beni u thellua, foli plot pathos për mrekullitë e trupit të njeriut, trurin ende të pashpjegueshëm, universin, ekuilibrin, perfeksionin...si i shpjegonte Skifteri këto?

Kjo mënyrë e ndyrë deduksioni më në fund e irritoi Skifterin. Fakti që akoma nuk shpjegojmë dot shumë gjëra s'ka pikë lidhje me vërtetësinë e atij librit që kanë shkruar ca primitivë shkretëtire para 2.000 vjetësh. Kështu thuhej edhe për rrufetë...derisa u shpjeguan.

Beni kaloi në temë tjetër, më të butë. Po nuk besuam, ku do i gjejmë vlerat morale universale? Përndryshe çdo njeri ka të drejtë të vrasë, të përdhunojë...

Një libër më i besueshëm se bibla

Beni Beni Beni, në Kinë s'ka patur krishtërim dhe vlerat morale i kanë shumë të ngjashme me tonat. S'pati nevojë për ato 10 urdhëresat...jo për gjë, po ky Zoti yt nuk denjoi të përhapte fjalën e tij në vende të tjera, vetëm në Lindjen e Mesme. Në Amerikën Latine s'dinin gjë fare që kishte zbritur ai tipi dhe ishte ringjallur, vetëm kur shkuan spanjollët dhe portugezët dhe duhet të zgjidhnin; krishtërimin ose thikën në fyt.

Skifteri gjeti një pretekst për tu larguar, kishte shumë nevojë për 2 gjëra kyçe:

Pak alkol dhe shoqërinë e seksit të kundërt.

PS: Kjo ishte vetëm një pjesë e diskutimeve me Benin. Nuk u zgjatëm, diskutimet e mbetura një ditë tjetër.

PPS: Argo fiton 3 Oskar dhe Ben Affleck ankohet se pretendonte më shumë...nuk ka më mirënjohje në këtë botë, përfundimisht.

Gjeniu i vogël: Mos e bëj këtë se s'është mirë.