[Anatomi] Një thriller për të mos u humbur reloaded

Para pak ditësh një lajm tronditi botën e sportit dhe jo vetëm. Oscar Pistorius, gjatë një krize xhelozie, godet të fejuarën Reeva Steenkamp për vdekje. Për ata që s'e dinë, Pistorius është Blade Runner, atleti paraplegjik, kampion i Afrikës së Jugut i cili konkurron me atletët normalë, falë protezave prej metali elastik.

Ndonëse me famë të jashtëzakonshme, ai do të dalë përpara drejtësisë si gjithë të tjerët, i barabartë përpara ligjit. Jo si te ne, ku vrasjet për xhelozi janë bërë bukë e djathë dhe jo vetëm që nuk ndëshkohen rëndë, por madje hera-herës justifikohen nga publiku. "Normale o llaaa, jo po t'i varte medaljen në qafë".

Ej, prit një sekondë? Pse çfarë e dini Skifterin ju? Gazetë të përditshme që s'di ku të kapet dhe i mëshon së njëjtës temë? Këtë e diskutuam dje, sot çështja është një tjetër.

Hipotezat e para se Pistorius kishte kujtuar se një hajdut kishte hyrë në shtëpinë e tij dhe se Pistorius kishte vepruar me instikt, u copëtuan përnjëherë. Provat nxorën në dukje se viktima ishte goditur me shkop cricket-i disa herë, ishte ndjekur deri në banjë dhe kishte marrë fund aty. Ndër të tjera, disi pa lidhje me çështjen, në shtëpinë e tij u gjetën disa substanca të ndaluara në sport. Mbase ky është çelësi i leximit të ngjarjes.

Pistorius nuk është gjykuar akoma dhe s'është e drejtë të paragjykohet, por nëse të gjitha dyshimet do të konfirmohen, atëherë do kishim të bënim me kampionin e n-të që s'është në lartësinë e kampionit, që nuk e mban dot peshën e rëndë të suksesit.

Pistorius përfaqësonte ëndrrën e të dobëtit që niset me handikap dhe konkurron me më të fortët. "Është thjesht çështje kurajo dhe vullneti. Shiko Pistorius-in." Në qoftë se e dëshiron me të vërtetë mund t'ia dalësh mbanë dhe Pistorius ia doli. Po pastaj? A mund të fitojë Pistorius sërish? Po, mund të fitojë sepse ai stërvitet. Po në jetën e përditshme, çfarë njeriu është? I shkëlqyer, sa e sa vepra bamirësie. Po me femrat? Super i dëshiruar. Por... megjithatë e fejuara Reeva sikur...? Disa goditje shkopi...

From hero to zero. Shqip: Të kalbesh në burg.

Një kampion si ai, i thirrur nga shtypi dhe opinioni publik të jetë shembull për të rinjtë s'mund të gabojë në asnjë fushë. Duhet të jetë perfekt në gjithçka. Përndryshe, "është shumë i talentuar si atlet, por ama në jetën private...". Sikundërse, askush s'është perfekt në gjithçka, Pistorius ra viktimë e sukseseve të tij. Nëse donte të ishte në piedestal, i duhej që çdo gjë ta bënte mirë në jetë dhe të fitonte.

Por... a thua ka forca akoma për të fituar në gara? Pistorius kishte marrë substancat e ndaluara dhe po mendohej. Nuk kishte shumë opsione. Mund të tërhiqej dhe të lihej në harresë. Në gazeta nuk do dilte përditë, do e ftonin ndonjëherë në emisionet e të dielës. Mund të dopohej me rrezikun e vogël se mund të zbulohej, por shanset për fitore rriteshin tmerrësisht. Mund të konkurronte i pastër, por mund të dilte në vend të katërt ose të pestë. Mbase Pistorius do të kënaqej me zgjedhjen e fundit, por njerëzit janë të pamëshirshëm. "I katërti e? Paska ftof ky. Pse s'del në pension njëherë?", e dalë nga thellësia e shpirtit olimpik. Dhe ja ku Pistorius u bashkohet "kampionëve" si Lance Armstrong & friends, modelë brenda dhe jashtë sportit.

Nuk mund të fajësosh njerëzit, aq sporte dhe aq fusha jete ka, saqë po të dish vetëm kampionin e secilës konsiderohesh me kulturë të gjerë. Megjithatë çdo fushë, ka njohësit e vertetë, të cilët vlerësojnë dhe vendin e katërt dhe të pestë sepse e kuptojnë se sa sakrifica nevojiten për këto rezultate. Kjo ishte hapësira e tij dhe nuk kishte pse ta kalonte.

"I wish I knew my limitations", po mendon tani Pistorius. Këtë shprehje e kemi te librat e anglishtes në shkollë të mesme, por pak veta e kanë vënë re.

EPILOGU

Pistorius, që i raftë një meteor jarebi, është fajtor, dallohet që në fytyrë, kot harxhohen me gjyqin. Të dashurën e vrau sepse i kishte bërë një humor, jo kush s`ka kokë ka këmbë a diçka e tillë, akoma s`është zbardhur. Skifteri ka ca pyetje ekzistenciale që me siguri i ka edhe Pistorius. A do e pranojnë në ekipin e futbollit të burgut apo çunat do e paragjykojnë? Po pjesët e këmbës që mund t`i përdorë si thikë/kaçavidë dhe të vrasë njeri si do ja lejojnë brenda?

Presim të dashur lexues, misteri mister...

Gjeniu i vogël: Pistorius, gënjeshtra i ka këmbët e shkurtra...oops!