[Anatomi] Panoramex

Të dashur triliona lexues,

Skifterit i duhet të asimilojë jet lag-un nga udhëtimi i gjatë dhe i lodhshëm i fundjavës, por nuk mund të rrijë pa ju transmetuar energjinë pozitive që e karakterizon. Le ta fillojmë pra javën si gjithmonë, me eufori dhe entuziazëm ngjitës.

Ka një mini, po miniproblem këtu në Shqipëri që e ka emrin dashuri. Mmm, ekonomi. Jo, jo fakti që jemi një ndër vendet më të varfra në Europë. Nuk do e krahasojmë Shqipërinë me vendet e tjera, do ishte e padrejtë. Që nuk shkëlqejmë e dimë të gjithë, po s`është puna këtu.

Tani, për ta thënë me fjalët më popullore që vijnë në mendje, sikur je te lokali i lagjes dhe po pi kafe me një shok fëmijërie që tani është mekanik, shteti është gropë.

Shteti vonoi dhe mezi i dha rrogat e janarit administratës. U ka bizneseve – sidomos atyre që janë marrë me ndërtim rrugësh – shuma marramendëse borxh dhe nuk ua jep. Këto bizneset nuk mund të shlyejnë kreditë që kanë marrë nëpër banka, bankat si rrjedhojë kanë shumë kredi të këqija dhe të penalizuara maten 100 herë përpara se të kreditojnë një biznes tani. Të ardhurat nga emigrantët bien vazhdimisht, sidomos pas krizës…dhe do binin gjithsesi, kështu ndodh me çdo emigracion nëpër botë. 

Na duhet të themi që taksa e sheshtë – dhe e ulët – duket të jetë zgjidhje e mirë për situatën shqiptare. Tërheq investitorë (sadopak) dhe ndihmon (po sadopak) në vjeljen e taksave dhe reduktimin e evazionit fiskal. Kjo puna e evazionit tingëllon absurde, sepse normalisht është përgjegjësia e shtetit të mos t`i lejojë, por po flasim për Shqipërinë, të qëndrojmë më këmbë në tokë.  

Nga ana tjetër, ai tipi ndërton rrugë vazhdimisht dhe rrit rrogat dhe pensionet. Një shqiptar kur shikon në lajme rrugët që inaugurohen çdo javë (pavarësisht se nga 3-4 herë) mendon që vërtet Shqipëria nuk njeh krizë, se këta s`do ishin kaq idiotë të shpenzonin pa kriter kur s`kemi. Leqe ku i gjetën njëherë, fakti që kanë çfarë të shpenzojnë tregon që kemi resurse pa fund.

Se të jenë të papërgjegjshëm s`bëhet fjalë, s`ka ndodhur kurrë…

Në ekonomi nuk para ka rrugë misterioze, nuk i kemi shpëtuar ne krizës për mrekulli, kemi hyrë në borxh deri në fyt, kjo është përgjigja. Dhe këtë borxh do duhet ta paguajmë ne, nuk shlyhet nga qielli.

Si do e paguajmë?

Skifteri po ju jep në konfidencë përgjigjen e gjithë këtij thriller-i:

Vërtet nuk prodhojmë asgjë, edhe ajo mikrobujqësi që mund të kishte potencial po vdes nga konkurrenca maqedonase, por në verën që vjen priten 20-21 miliardë turistë që do zgjedhin detin, dhe 12.5 miliardë të tjerë që do përpijnë terrenet e pashkelura të maleve shqiptare.

Zgjidhja e krizës; lokalet ku pihet duhan

Vërtet këta turistët që vijnë këtu zakonisht kanë një çantë 12 metra kub në kurriz me 2150 sanduiça dhe 120 litra ujë. Ose vijnë me roulotte ku mundësisht kanë edhe naftën me bidona brenda. Por ama, sikur 1 euro të harxhojnë për ndonjë shpenzim të paparashikuar, shumëzimet mund t`i bëni vetë. 

Pastaj, gjatë vitit 2013, shteti do trefishojë gjobat ndaj dyqaneve të vogla nëpër lagje që nuk përdorin kasën fiskale dhe lokaleve ku pronari është menaxher, kamarier, banakier, pastrues dhe lejon të pihet cigare. Këto 2 kategori boll u tallën me popullin, mjaft me këta gjakpirës, bëjnë qindra e qindra euro fitim çdo muaj, duhet të kontribuojnë më shumë plehrat.

Pra, siç e shihni, çdo gjë është parashikuar në detaj. Strategjia është e mirëmenduar, nuk na shpëton gjë.

Ne e fusim krizën në krizë.

Qeshni, lodroni, ka dalë dielli.

Gjeniu i vogël: Ekonomia o copë se ka ra leku, a kupto.