[Skifteri edukon] Misteri i Altinit

Skifteri sot do ndajë diçka shumë konfidenciale me ju, diçka që 1-2 veta e dinë. Ju lutet të keni kujdes me shpërndarjen e këtij informacioni, këtu luhen jetë njerëzish, interesa të mëdha, ide tronditëse që mund ta shokojnë qytetarin e thjeshtë të papërgatitur.

Fillojmë, afrohuni edhe pak se dëgjohet, mos bëni zhurmë, ok ok po pa prekur, me terezi, qetësohuni…ashtu:

Revolucionin popullor që hodhi poshtë sistemin komunist në Shqipëri e ka organizuar, financuar dhe kryer një alien. E dëgjuat mirë, një alien që ishte i ngopur me vuajtjet e popullit shqiptar të shtypur, me aspiratat e një kombi të shkelura me të dyja këmbët.

Alieni e ka emrin Altin, ia ka vënë i ati, i cili i trasmetoi edhe dashurinë për Shqipërinë. Madje në shtratin e vdekjes babai i la amanet kujdesin për atdheun tonë. Kështu, Altini në vitet `80, duke parë edhe dobësimin e pushtetit dhe punën që po bënte CIA nëpër shtetet e tjera, filloi agjitacionin dhe arriti të çlironte shqiptarët nga thundra e përdhunës. Buzëqeshi i kënaqur, pa edhe njëherë nga lart dhe tha:

“Unë po iki, shqiptarët e mi të dashur, tani nuk keni më nevojë për mua, tani do ecni vetë, jeni të lirë”.

Altini këto 23 vjet kishte qenë shumë i zënë, por para ca ditësh u rikthye të shihte Shqipërinë e dashur, vetëm se pas një nate të rëndë alkooli ai harroi ditarin e tij në një pub. Ditari iu dorëzuar Skifterit, i cili do negociojë këto ditë me Altinin për të.

Ndërkohë po publikojmë çfarë ka shkruar Altini rreth vizitës së tij të fundit disaditore:

“Shqipëria ka bërë hapa galopantë përpara, eksitohem kur mendoj ku kanë qenë dhe ku janë, e pabesueshme sa mund të arrijë njeriu kur ka liri, këto vura re:

Nuk vazhdohej më kështu

1.    Nuk ka më oligarki që vendos gjithçka, tashmë pushtetarët kanë shtëpi kush në bllok, kush afër liqenit, kush në periferi.
2.    Çunat putheshin 6 herë në faqe, tani kanë rënë në katër. Ka edhe nga që mjaftohen me një dyshe.
3.    15-katëshit ja kanë futur disa ndërtesa për lartësi.
4.    Kumari ka evoluar në mënyrë eksponenciale. Altinit i kujtoheshin lojërat me tre letra, ose tre kuti dhe një zar. Tani çdo qytetari i ofrohet lloto e familjes sa del nga shtëpia. Ka kazino fantastike, pavarësisht se ka ende punë për të bërë, nuk shuhet etja për kumar me ca APEX primitivë, duhen më shumë tavolina pokeri, etj.
5.    Njerëzit kanë evoluar, nuk shikojnë më filxhanin e kafes, por kanë njerëz të specializuar nëpër lagje që edhe parashikojnë të ardhmen, edhe kurojnë absolutisht çdo sëmundje duke hequr pacientët nga kurat e dhëna nga doktori. Njerëz që Skifterin e bëjnë të dyshojë për heqjen e dënimit me vdekje, po nejse.
6.    TVSH tashmë ka plot dy televizione. Tashmë, përveç “Hapësirë e blertë” mund të bëjnë edhe një super emision për gjeologji-miniera, i kanë të gjitha kushtet. Mezi shkëputet teleshikuesi nga këto kanale.

E vetmja gjë që më trishton, është se emri Altin po rrallohet. E prapë, u kënaqa tek dëgjova Kevin Beqiri, Jonathan Karagjozi, Julpjer Karabina, Alejandro Maliqi…”

Skifterit i erdhën lajme se Altini kishte arritur kaq i entuziazmuar në shtëpi, sa i kishte ofruar gruas seksin më të mirë të jetës së saj.

Gjeniu i vogël: Nuk luj më kuqe tzez, se o me tfutme. Vetëm rrulet blek xhek.

                                                                             PIRS