[Life style] Haute Couture

Iliri (40 vjeç, mësues, nga Gjirokastra) - Veshja nuk ka rëndësi. Mjafton të jesh i pastër dhe i rregullt. Pastaj moda me cikle e ka. Sot kjo triko që kam veshur mbase s'është në modë, por për 4-5 vjet mbaje mend po s'u bë e modës.

Arkida (29 vjeç, PR, nga Tirana) - Look-u është shumë i rëndësishëm. Është impakti i parë që të tjerët kanë me ty. Motto ime është "don't just dress up, make a statement". Dhe unë dua të jap një mesazh në varësi të eventit ose të gjendjes shpirtërore. Jeta është bërë shumë dinamike. Njerëzit kalojnë gjithmonë e më pak kohë me njëri-tjetrin, kështu që secili mbetet me përshtypjen e paraqitjes.

Erla (21 vjeç, studente, nga Kavaja) - Kush blen rroba nga firmat e mëdha nuk realizon se çfarë shfrytëzimi njerëzor bëhet në vendet e botës së tretë. Abuzime me fëmijë dhe kushte pune të turpshme. Zgjidhja? Të veshim rroba no name, në këtë mënyrë japim një mesazh të fortë dhe pse jo, të trondisim themelet e këtyre monstrave.

Veshje tipike e Shqipërisë së mesme

Isida (23 vjeç, studente, nga Rruga e Elbasanit) - Më pëlqen të vishem high heels, ndonëse jam e gjatë 1.80 dhe në qytet shkaktoj tërmet. Hahaha. Më pëlqen kur njerzit më thonë: "E pe çfarë pele kaloi? 2 metra!". Është mëkat të kesh linja dhe të mos i shfrytëzosh. Nuk më ka ndodhur asnjëherë të mos më rrinë rrobat mirë në trup. Edhe ndonjëherë kur kam patur dyshime, shitëset më kanë thënë se ashtu është vetë modeli dhe s'kam patur arsye për të dyshuar.

Renisi (24 vjeç, aktor, nga Fieri) - Më pëlqen që rrobat ti kem firëm. Kam dhe një filozofi timen. Të gjithë duan t'i kenë firëm por s'i kanë dot. Pra, kur ti vjen me rroba firme, ke ato që të tjerët ëndërrojnë dhe kjo të krijonë superioritetë. Më ka qëlluar që të kem parë këmisha te Tomi Hilfiger, por pa stemë. Ç'i do ato? Ça zgjidh? Janë gjëja më pakuptim në botë.

Greta (26 vjeç, e papunë, nga Shkodra) - Më pëlqen të bëj shopping vetëm kur ka uljet. Më pëlqen kjo ndjesi sepse më duket sikur kurse robi. Ka raste që gjen me 100 euro një fustan që ka qenë 400. S'është fantastike? Habitem pse shitësit nuk e vënë çmimin fillestar 800 euro. Do më bënte të ndihesha dhe më mirë.

Fatjoni (25 vjeç, infermier, nga Tirana) - Malli duhet të jetë cilësor dhe të rrojë gjatë. E di se jep dy lekë më shumë po ama e ke për pesë vjet. Megjithëse unë rri me përparëse dhe s'para blej rroba. Po për ju e thashë.

Bedrija (42 vjeç, ish punonjëse CEZ, nga Tirana) - Ku ka si Gabi! Sa të blesh te Medreseja mall skarco turk ose kinez, 100 herë më mirë Gabi. I ke dhe firmato. Higjena? Po i lan mi, me 90 gradë.

Entela (21 vjeç, studente, nga Tirana) - Më pëlqen shopping në vetvete. Sa herë që ndihem blue, domethënë down, kupton?, bëj shopping dhe ma ngre shumë moralin. Të gjitha rrobat e dyqaneve i di përmendësh. Kur kanë probleme me inventarin te TEG-u ose te QTU-ja më marrin në telefon. Po prapë, këtu në Shqipëri malli është copë-copë. Blen një gjë shtrenjtë, vetëm kur sheh një debile me të njëjtën çantë. Të vjen ta djegësh çantën, ose më mirë çantën e asaj injorantes. Jo se para se të vija këtu në redaksi më ndodhi, prandaj jam pak kështu.

Një pasdite tipike e gruas shqiptare

Brikena (21 vjeç, manager assistant, nga Tirana) - Nuk më pëlqen të vishem me marka të njohura. Më pëlqejnë gjëra të thjeshta tip Converse.

Esterisela (shkurt Sela, 23 vjeç, sipërmarrëse, nga Tirana) - Më pëlqen sidomos të bëj shopping për intimo. I zgjedh me kujdes dhe nga më të shtrenjtat. Gjithsesi, jam zhgënjyer nga meshkujt të cilët, në përgjithësi, nuk rrinë t'i shohin më shumë se 5-10 sekonda. Meshkujt për detaje janë zero.

Errata corrige: U nxituam pak më parë, kjo është pasditja e gruas shqiptare, kur ka reklama Sulejmani i Madhërishëm

Alinka (27 vjeç, këngëtare, Bukuresht) - Vajzat shqiptare kanë filluar të vishen shumë bukur. Jo, vajzat në Tiranë doja të thoja. Jo, më fal, vajzat në bllok.

Bill Gates (57 vjeç, inxhinier, nga Seattle) - Kryesisht më pëlqen të vishem me pulover dhe me xhinse. Çfarë thonë të tjerët për veshjen time? Hahahahahahahahahahahahaha.

Si përfundim, vishuni si të doni, vetëm fustanellat për djemtë si në Skoci dhe Labëri na i kurseni.

PS: Ok, skandaloze vrasja e kryekomisarit. Por...që të nesërmen te varrezat e dëshmorëve?! Pa u zbardhur asgjë? Po të dalë që e kanë vrarë se ka shkuar me gruan e njërit, për shembull, pa lidhje me detyrën? Do e zhvarrosin&zhvendosin?

PPS: Populli italian është një popull injorant. Dhe mos na thoni që s`mund të përgjithësojmë.

Gjeniu i vogël: Në të ardhmen njerëzit do vishen lakuriq.