[Ashtuuu] Ku e lamë?

Të dashur lexonjës,

Gjatë këtyre muajve, Skifteri ka kaluar aq bukur sa nipërit s`do e besojnë kur t`ua tregojë. Festa të çmendura, abuzime me substanca dhe njerëz, koncerte disaditore, udhëtime në Damask-Ramallah-Kashmir-Ishujt Senkaku-Abkhazi-Makhachkala dhe perla të tjera të fshehura, pa harruar faktin që ka lexuar 1252.5 libra vetëm në plazh, orët e para të mëngjesit.

Blogun e kishte harruar fare, të jemi të sinqertë.

Deri pak para shtatorit…

Pikturë nga ngjarjet e kohës, Jonathan Onufri

Aty vijnë emailet dhe letrat e para drejt Skifterit nga lexuesit, të cilët i kujtonin premtimin e rikthimit në 1 shtator. Skifteri, edhe për respekt ndaj popullit polak, sqaroi se nuk ishte gati për rikthim. Irritimi rritet. Letrat marrin formë agresive, Skifteri akuzohet për mungesë integriteti, një nga lexuesit kërcënon se do publikojë adresën e shtëpisë së Skifterit. Skifteri qesh, duke qenë se emrin e rrugës, numrin e shkallës dhe apartamentit nuk i di as vetë. 

Letrat shumëfishohen, revolta popullore fillon të ziejë. Presioni rritet, nuk ka më rrugë mbrapa. 

Por Skifteri përton të shkruajë.

 

12 shtator – Skifteri gjen gomat e makinës të çpuara dhe një letër me “Herën tjetër e ke radhën ti, shkruaj!”.

23 shtator – Merret peng një e dashur e Skifterit. Skifteri nuk ndryshon mendim, kjo s`hynte as te të preferuarat gjithsesi.

1 tetor – Skifteri gjen të ngrira dy llogari në Qipro. Vidhet një Caravaggio në shtëpinë e tij.

12 tetor – Merret peng një tjetër e dashur e Skifterit. Akoma numrat nuk duken substancialë, Skifteri nuk dorëzohet.
16 tetor - Ditëlindja e Enverit. Të 11 veteranët e mbetur homazhe në varreza. Dashuri unanime.

24 tetor – Merren peng edhe dy të tjera. Këtu Skifteri fillon të shqetësohet për nivelin e stokut, numri s`është më dyshifror.

12 nëntor – Në parlament hidhet ideja për një referendum. Le të vendosë populli për rikthimin e Skifterit.

…

Duke mos patur asnjë shpresë për rezultate të favorshme në referendum, Skifteri ngre flamurin e bardhë, deklaron kapitullim pa kushte (asgjë nuk mori mbrapsht), dhe vendos të shkruajë përsëri.

U zgjatëm shumë se na u duk e drejtë që e vërteta të dalë lakuriqe.

Ajo që donin të thonim ishte:

Në fillim të janarit fillojnë shkrimet në këtë blog.

Stay tuned.